Kuwa 14 Ukwakira 2016, Nyakubahwa Minisitiri w’Abakozi ba Leta n’Umurimo; Judith Uwizeye, yitabiriye umuhango wo gutangiza Igihembwe cy’Ihinga 2017 A, aho yasabye abaturage guhinga kijyambere ndetse bahuza ubutaka.
Minisitiri Uwizeye usanzwe akurikirana Akarere ka Huye nk’umujyanama wako, yashimiye abaturage bari bitabiriye icyo gikorwa cyari cyabereye mu Kagari ka Gatobotobo, Umurenge wa Mbazi Akarere ka Huye, abwira aba baturage ko nibashyira ingufu mu guhinga kijyambere nabo bazatera imbere bagasezerera ubukene burundu.
Minisitiri w’Abakozi ba Leta n’Umurimo yagize ati “ndashima uburyo mwitabiriye iki gikorwa muri benshi, bigaragaza ko ubuhinzi mubuha agaciro cyane cyane ko abenshi bubatunze, ndabasaba gukomeza gushyira ingufu mu guhinga kijyambere, muhuza ubutaka ndetse mukoresha n’inyongeramusaruro kugira ngo umusaruro mukura mu buhinzi ubateze imbere.”
Minisitiri Uwizeye kandi yibukije Abari bitabiriye iki gikorwa ko imiyoborere myiza y’u Rwanda irangajwe imbere na Nyakubahwa Paul Kagame ariyo ituma igihugu gikomeza gutera imbere, ko ubu byoroshye kwifatanya n’abayobozi mu bikorwa ibyo aribyo byose biteza igihugu imbere, bitandukanye n’uko byahoze mbere ya Jenoside.
Minisitiri w’Abakozi ba Leta n’Umurimo yasabye abo baturage kandi kwitabira gahunda yo kugura mutuel de santé kugira ngo biteganyirize mbere yo kurwara.
Abaturage bo mu Murenge wa Mbazi bari bitabiriye icyo gikorwa cyo gutangiza igihembwe cy’Ihinga 2017 A basagaga Magana atanu, bakaba kuri uwo munsi barateye imbuto y’ibigori.